Probiotikët mund të bëjnë më shumë sesa të përmirësojnë shëndetin e zorrëve. Ata gjithashtu mund të përmirësojnë në mënyrë indirekte trurin tuaj.
Studimet tregojnë se zorra dhe truri janë të lidhura, një partneritet i quajtur boshti zorrë-tru. Të dyja janë të lidhura nëpërmjet sinjalizimit biokimik midis sistemit nervor në traktin tretës, i quajtur sistemi nervor enterik, dhe sistemit nervor qendror, i cili përfshin trurin. Lidhja kryesore e informacionit midis trurit dhe zorrëve është nervi vagus, nervi më i gjatë në trup.
Zorra gjithashtu është quajtur “truri i dytë” sepse prodhon shumë nga të njëjtët neurotransmetues si truri, si serotonina, dopamina dhe acidi gama-aminobutirik, të cilët të gjithë luajnë një rol kyç në rregullimin e humorit. Në fakt, vlerësohet se 90% e serotoninës prodhohet në traktin tretës.
Çfarë ndikon në zorrë ndikon shpesh në tru dhe anasjelltas. Kur truri juaj ndjen telashe – përgjigja luftoni ose ikni ( fight or flight) – ai dërgon sinjale paralajmëruese në zorrë, kjo është arsyeja pse ngjarjet stresuese mund të shkaktojnë shqetësime të tretjes. Nga ana tjetër, shqetësimet gastrointestinale si sindroma e zorrës së irrituar (IBS), sëmundja e Crohn ose kapsllëku kronik mund të shkaktojnë ankth ose depresion.
Boshti tru-zorrë funksionon edhe në mënyra të tjera. Për shembull, zorra juaj ndihmon në rregullimin e oreksit duke i treguar trurit se kur është koha për të ndaluar së ngrëni. Rreth 20 minuta pasi keni ngrënë, mikrobet e zorrëve prodhojnë proteina që mund të ulin oreksin, që përkon me kohën që shpesh u duhet njerëzve për të filluar të ndjehen të ngopur.
Si mund ti lidhim probiotikët me boshtin zorrë-tru? Disa kërkime kanë zbuluar se probiotikët mund të ndihmojnë në rritjen e humorit dhe funksionit njohës dhe në uljen e stresit dhe ankthit. Për shembull, një studim i botuar nga Frontiers in Aging Neuroscience zbuloi se pacientët me Alzheimer që pinin qumësht të bërë me katër lloje bakteresh probiotike për 12 javë shënuan më mirë në një test për të matur dëmtimin kogntiv krahasuar me ata që pinin qumësht të zakonshëm.
Një studim tjetër i raportuar në revistën Gastroenterology zbuloi se gratë që hanin kos me një përzierje probiotikësh dy herë në ditë për katër javë ishin më të qeta kur ekspozoheshin ndaj imazheve të fytyrave të zemëruara dhe të frikësuara në krahasim me një grup kontrolli.
Është shumë herët për të përcaktuar rolin e saktë që luajnë probiotikët në boshtin zorrë-tru pasi ky hulumtim është ende në vazhdim. Probiotikët jo vetëm që mund të mbështesin një zorrë më të shëndetshme, por edhe një tru më të shëndetshëm.
