Një studim sugjeron se frika nga rrëzimi ose lëndimi e bën ushtrimin më të vështirë për disa njerëz me obezitet
Një fjalë e thjeshtë që të gjithë e dëgjojmë shpesh – ushtrimi – i bën shumë njerëz të dridhen. Kujtimet jo të bukura të fëmijërisë për sportet e shkollës ose klasat e palestrës, vështirësia për të gjetur kohë ose aktivitete të këndshme mund të ndihmojnë në shpjegimin e kësaj. Për më tepër, për disa njerëz me obezitet, frika nga rrëzimi ose lëndimi është një pengesë shumë e madhe për aktivitetin, sugjeron hulumtimi i fundit.
Ky zbulim ka implikime të rëndësishme për shëndetin dhe mirëqenien. Pra, si mund ta bëjmë lëvizjen të sigurt dhe të gëzueshme për njerëzit e të gjitha peshave?
Pse të jesh aktiv?
Siç mund ta dini, të qenit fizikisht aktiv ndihmon në luftimin e ankthit dhe depresionit. Parandalon hollimin e kockave dhe tonifikon muskujt, ju ndihmon të flini më mirë, ul presionin e gjakut dhe sheqerin në gjak dhe përmirëson nivelet e kolesterolit. Do të duheshin shumë medikamente për të bërë gjithçka që aktiviteti fizik rutinë mund të bëjë për ju.
Programet e humbjes së peshës shpesh përfshijnë ushtrime. Hulumtimet tregojnë se ushtrimet ndihmojnë në ruajtjen e peshës dhe mund të ndihmojnë në humbjen e peshës. Përtej djegies së kalorive, stërvitja e rregullt gjithashtu ndërton masë muskulore. Kjo është e rëndësishme pasi muskujt janë metabolikisht aktivë, duke çliruar proteina që luajnë një rol në uljen e oreksit.
Çfarë na thotë ky studim?
Studimi zbuloi se shumë njerëz me obezitet i frikësohen lëndimit dhe rënies, gjë që ndërhyn në gatishmërinë për të ushtruar. U ndoqën 292 pjesëmarrës të regjistruar në një program mjekësor tetë-javor për humbje peshe në Sydney, Australi. Të gjitha plotësonin kriteret për obezitet ose obezitet të rëndë. Mosha mesatare ishte 49 vjeç; një e treta e pjesëmarrësve ishin meshkuj dhe dy të tretat ishin femra.
Në fillim të studimit, pjesëmarrësit plotësuan një anketë me 12 pyetje për perceptimin e lëndimeve. Shumica raportuan frikë nga lëndimi ose rrëzimi dhe besonin se pesha e tyre bënte që lëndimi të ndodhte më shumë. Një e treta thanë se frika e tyre i ndaloi ata të ushtroheshin. Studiuesit gjithashtu regjistruan peshën, gjatësinë dhe perimetrin e belit dhe administruan teste të forcës gjatë sesionit të parë, të katërt dhe të fundit.
Kur studimi përfundoi, studiuesit zbuluan se pjesëmarrësit më të shqetësuar për lëndimin nuk kishin humbur aq shumë peshë sa ata që nuk e shprehën këtë frikë. Ata që nuk kishin humbur aq shumë peshë gjithashtu prireshin të kishin rezultatet më të larta të depresionit, ankthit dhe përgjumjes.
Frika nga lëndimi nxit një cikël të rrezikshëm
Siç u përmend, stërvitja është e shëndetshme në çdo peshë: mbron zemrën tuaj, ul sheqerin në gjak, rrit humorin tuaj dhe zvogëlon ankthin. Ajo gjithashtu ndërton ekuilibrin. Ushtrimet si ecja parandalojnë hollimin e kockave.
Nëse shqetësimet për lëndimet ose rrëzimet i bëjnë njerëzit të shmangin stërvitjen, ata humbasin përfitimet e aktivitetit të rregullt për ndërtimin e ekuilibrit, forcimin e muskujve dhe kockave dhe përmirësimin e humorit. Ata mund të kenë më shumë gjasa të bien – dhe ndoshta më shumë gjasa të pësojnë fraktura.
Gjeni një përzierje aktivitetesh që do të funksionojnë për ju
Të gjithë, në çdo peshë, duhet të gjejnë mënyra për të ushtruar në mënyrë të sigurt dhe të gëzuar.
- Filloni nga pak dhe ecni ngadalë. Nëse nuk jeni aktualisht aktiv, filloni thjesht duke u ulur më pak dhe duke qëndruar më shumë në këmbë. Provoni të ecni për dy minuta çdo gjysmë ore. Nëse keni frikë se mos bini, provoni të ecni në vend ose së bashku me një mik ose një të dashur që mund t’ju jap siguri dhe rehati.
- Kërkoni udhëzime. Merrni parasysh t’i bashkoheni një grupi ku mund të përfshiheni në aktivitete të mbikëqyrura, ose kërkoni nga mjeku juaj një recetë për terapi fizike për t’ju ndihmuar të përmirësoni ekuilibrin tuaj dhe të ndërtoni besimin tuaj.
- Provoni aktivitete të ndryshme për të parë se çfarë funksionon për ju. Ecja është një aktivitet i thjeshtë dhe i shëndetshëm, por nuk është forma e vetme e aktivitetit që mund të provoni. Ju mund të shijoni notin ose gjimnastikën në ujë. Provoni të pedaloni një biçikletë të ulur ose një biçikletë krahu (ergometër i sipërm i trupit) që ju lejon të qëndroni ulur ndërsa i shtyni pedale me krahë në vend të këmbëve. Aktivitetet adaptive dhe sportet e krijuara për njerëzit me kufizime fizike dhe paaftësi janë gjithashtu një opsion. Në varësi të nivelit të fitnesit dhe interesave tuaja, mund të konsideroni edhe kërcimin, çiklizmin ose çdo gjë tjetër që ju bën të lëvizni më shpesh.
Së fundi, mbani në mend se shumë njerëz vuajnë nga ankthi dhe frika e rënies, por kjo nuk është e pakapërcyeshme. Nëse jeni vërtet duke luftuar, bisedoni me mjekun tuaj ose një profesionist të shëndetit mendor.
